منتدى قرية الدناقلة
DANAGLA CYBER COMMUNITY

جمهورية السودان
ولاية الجزيرة

مجتمع قرية الدناقلة الرقمي

أخي الزائر الكريم

اذا لم تكن مسجَّلا بعد في منتدى قرية الدناقلة, نرجو اكرامنا بالتسجيل و الانضمام الى أكبر تجمع رقمي لابناء قرية الدناقلة على الانترنت

اذا كنت مسجلا فعلا, ارجو الدخول و عدم حرماننا من رؤية اسمك على قائمة الأعضاء اذا واجهتك مشكلة ارسل رساله الى الهاتف 09117685213

ولك وافر الشكر و الامتنان

أسرة منتدى قرية الدناقلة

رد لسان الحال ( حال اللسان )

استعرض الموضوع السابق استعرض الموضوع التالي اذهب الى الأسفل

رد لسان الحال ( حال اللسان )

مُساهمة من طرف وفاق عبدالباقي يوسف في الأحد مايو 05, 2013 7:41 pm

ماكنت داير الإغتراب
لكني مجبور إبتعدت
حسيت متل غمز الحراب
وفي أنه الصبر النكد
أرجع وأقول إنتي السبب
قلتيها لي مابترضي بي عيشة وسط
دايراها فوق عيشة رغد
قاريهو في عيون الصغار
طلباتم الماليها حد
حسيتو في عينيك سؤال
إحترت ما لاقيلو رد
نظراتك الحادة النبال
سيطان بتلهب في الجسد
وأنا كنت صابر زي بلال
كان ردي ليها أحد أحد
الكاتمو في جواي كتير
من حرقتو الجوف إتهرد
ماكنت قاصد أقولو ليك
لكن لسان الحال سرد
مابنسي يوم ودعتكم
وبي حسرة غادرت البلد
ختيت علي جرح الفؤاد
فرق البيات فرق الولد
ماإعتدت أفارق للصغار
والوجعة فرق الفي المهد
زفر القليب آهآآآت حزان
حسيتو جواي إرتعدت
كان إنتي شوقك لي بحر
كيفن أنا المكتول كمد
خليت لك الروح والقلب
سافرت بي باقي الجسد
عارفك حريصة علي العيال
فوقك بعد الله إعتمدت
في الحارة تسويلك رجال
للمايلة والمحتاج سند
إتغشن القالن وراي
هلن لو نجيمات السعد
ماإتغربن وضاقن معاي
مر عيشة الهم والنكد
لو عني كررتي السؤال
أنا بيني وبين الفرحة سد
سهيت وغايتو عليٍ حال
يعلمو الفرد الصمد
عذابي في قاطوع صغير
في ضيقو زي ود الأحد
في السوق صباحات الله خير
حايم وأزازي بلا غرض
الزيي بيهو الليل يطول
يتقلي فوق جمرو الوقد
إتوقعي البجي ليك يقول
في الغربة محبوبك فقد
البي ده مابغباهو زول
يحكيهو طرفي الماغمد
سنتين أفتش في كفيل
لي حالي قد زول مانشد
في التالتة رب العزة قال
حامدنو حلال العقد
مكتب ولا كان في الخيال
في الفارة اتدور قعدت
عربية والراتب كبير
ورابطلي خرزة من الحسد
بليت عروق قلبي المرير
عزة ورفاهية وسعد
لكني ياحظي التعيس
تميتلي شهرين وإترفدت
قالوا الوظيفة إتعممت
محجوزة لي أهل البلد
شوفي الضرايب فوقي كم
كان جيت أفكر في البلد
وزي الكلام ده يزيدني هم
ويرفع لي إفراز الغدد
قوليها لا تهابي الحروف
كان في غيابي الشوق برد
البي ده كلو من الظروف
والله ما لي فيهو يد
الببقي من فك الحرير
ماخدنو من فك الأسد
بي ضحكة في أبواب جحيم
لي دمعة إتبلابة خد
أنا شان رضاك أرحل بعيد
لي غربة لي دمعة وسهد
وأنا فيها ساهي البال شريد
أفكاري فيكم وفي البلد
سامحيني لا تتابعي الظنون
مازلنا بيناتنا الوعد
والغربة من أجلك تهون
وطعم العزاب يصبح شهد
جوابك الظاهرو الوداد
كاتباهو بي دمع الحرد
يجي ردو في نفس الميعاد
نتلاقي طيارة الأحد
الكاتمو في جواي كتير
من حرقتو الجوف إتهرد
ما كنت قاصد أقولوا ليك
لكن لسان الحال سرد ...

******

وفاق عبدالباقي يوسف
عضو مشارك

عدد الرسائل : 17
بلد الإقامة : السودان
الإسم الكامل : وفاق عبدالباقي يوسف الفاضل
نقاط : 1432
تاريخ التسجيل : 11/02/2013

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى