منتدى قرية الدناقلة
DANAGLA CYBER COMMUNITY

جمهورية السودان
ولاية الجزيرة

مجتمع قرية الدناقلة الرقمي

أخي الزائر الكريم

اذا لم تكن مسجَّلا بعد في منتدى قرية الدناقلة, نرجو اكرامنا بالتسجيل و الانضمام الى أكبر تجمع رقمي لابناء قرية الدناقلة على الانترنت

اذا كنت مسجلا فعلا, ارجو الدخول و عدم حرماننا من رؤية اسمك على قائمة الأعضاء اذا واجهتك مشكلة ارسل رساله الى الهاتف 09117685213

ولك وافر الشكر و الامتنان

أسرة منتدى قرية الدناقلة

العجَين المرِ هاشم صديق

استعرض الموضوع السابق استعرض الموضوع التالي اذهب الى الأسفل

العجَين المرِ هاشم صديق

مُساهمة من طرف khoaga99 في الثلاثاء يوليو 31, 2012 6:45 pm

العَجِين المُر

شعر : هاشم صديق

سَكّيتى
السحابة السمرا
من قيسان
ولي قِبلة
سما أمدرمان .
...........
يوم الجمعة
صلّينا
دعينا المطرة
شان تنزل
جات المطرة
بالبمبان .

..........
اتحرّينا لي رؤية
شهر رمضان
اتفاجئنا بي رمضان
كان حاضر .
مَرّ الحول
وما فاتنا
كان واقف
وكان حارِن
تقول حردان .
............
تمام حولاً
ونحنا تملّي
ناس صايمين
وماعارفين .
ما حللنا صوم
بي تمرة
ما بلّينا بي حلومر
حلق نشفان .
............
شن الصوم
وشن الرؤية
يا ( عشمانة )
كان عزّ القِرِش
في اءلايد
واتقدّد
جِلِد جُزلان ؟!
............
لا زِرّيعه
لي الآبري
لا عجالي
لي شرموط
لا ( تيبار )
عجيناً مٌر
ولا في عصيدة
بي ملاحاً
لذيذ ويسُر
..........
لا في بليلة
في حلة
ولا تمراً كُبار
في كورة
يتبلا.
........
لا فحماً
ولا ملحاً
ولا قِرشاً
يجيب شيتاً
من الدكان .
..........
اتشققنا
لّما نشفنا
واتقلّينا
لما نجِضنا
واتفتفتنا
لما كملنا
وأسيادنا السُمان
(كيزان ) .
..........
قرصنا الجوع
مرقنا هتفنا
ضد والينا
ضد خانقنا
ضد كاتلنا
كان صوت
الوجع عالي
وكان نقحي الجروح
مسموع
ضحكوا علينا
ناس ( كاكوما )
و ( ود برهوما )
قالوا علينا
أحسن لينا
( لحس الكوع )
سبحان الخلق
أشتات
ديل ناس الشرف
ناصل
وناس أصل الخجل
مجدوع .
...........
صعاليك البلد
حاكمين
أشراف الوطن
صاغرين
يمرقوا غلابة
للبمبان
وتتكندك
سما أمدرمان
والفراجة
و (المهراجا )
بس لابدين .
...........
سمح والِينا
لما يفور
ولما يثور
علي منصة
ويهز الايد
كمان تجديد
في أصل
( العرضة )
والرقصة
يهيج فينا
وكمان يدينا
كم حصة
عشان كوركنا
من جوعنا
كسرنا الخوفة
والرصة
طلعنا هتفنا
مرقنا دفرنا
زي سيلاً نتر
دفَاق
و بقينا وصرنا
عند الوالي
متآمرين
كمان شماسة
ضد الدِين
وناس عُملا
و( شذاذ آفاق ).
...........
مسكينة يا عشمانة
قالوا تقاطعي
حسه اللحمة
كان حمرا
وكان بيضا
تحاربي طماطمة
حُمرة عين
وتبعدي من البيض
حت ءان بيضة
أو بيضتين
دحين
قبال كلامهم ده
كنتي مقاطعة
اسرائيل
أو الكفار ؟
كنتي بتاكلي
يا عشمانة
ديمة سخينة
أو كافيار ؟!
.........
مسكينة
يا عشمانة
يا حيرانه
جاتك حسه
نار كُربه .
حتي الكهربا
شوف عينيك
سماع اضنيك
جن ضَرَبا
ووقدت نار
كمان قَدَلَت
رافعة النخرة
واتنفَشَت
تقول سد مروي
ءاتْلبّش
بجن حبشي
ونازل ظار
.............
شنو الخلوهو
ما زادوهو ؟
غير نَقَص العُمر
والحيل
شنو السابوهو
ما قطعوهو
كان حتي الوطن
قصوهو
من مليون
صبح كم ميل ؟!!
.........
( وا أسفاك (1)
يا عشمانه
من ناس ديك
و ( وآ أسفاي
من ناس
ديل )
ناس ( المؤمن
الطعّان
والفاحش
واللّعان )
تقول ( القُدوة )
ما كانت
( رسول الله )
ولا المسلم
لسانو تُقَا
وحديثو نبيل .
..........
ديل يا زولة
ما قارين
صِحاف خُلفا
ولا عارفين
منو ( العُمَرين )
ولا دارين
شنو ( الأخلاق )
ووين ( موقع )
شتايم الوالي
عندالله
كان الشعب
شحادين
وكوم عُملا
و ( شذاذ آفاق )
والبهتف
في وش الوالي
كان تَشّاهو
جمر الجوع
أحسن ليهو
( لحس الكوع )
وبكون ( مدفوع )
وزول عولاق
.............
يا عشمانه
( رغم السيف )
ورغم القيد
راية العزّه
ما بتندّلا
تظل مرفوعة
زي رأس
الوقف جبار
ولمس النار
ما رمّش
ولا اتذلاّ
............
وكان ألفين
ورا الأسوار
هناك ثوار
بجيبو التار
ويقولوا ( نعم )
لكلمة ( لا ) .
............
بكره قريبه
يا عشمانه
نتماسك
نقيف في وش
لصوص الدين
ربيعنا العربي
ما مخنوق
ولا مسروق
ولا تلجين
ولا تلحين
ربيعنا العربي
من ابداع
شباب مغبون
حمم طالع
جحيم فارع
من بركان
غضب مجنون
..........
نشوف بكره
منو البلحس
عديل الكوع
ومنو الواقف
وراس مرفوع
..........
منو الشعب
الهتف طالع
ملا الآفاق
منو الخايين
منو الخايبين
ومعروفين
( شذاذ آفاق )

khoaga99
مشرف القسم الإجتماعي

عدد الرسائل : 298
الإسم الكامل : طلال عبد الرحمن أحمد عبد الرحمن
نقاط : 3161
تاريخ التسجيل : 27/08/2009

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: العجَين المرِ هاشم صديق

مُساهمة من طرف ابوفدوى في السبت أغسطس 04, 2012 2:16 pm

اكيد الاستاذ هاشم صديق خير من يعكس مال الحال
فهو الصولجان الذى يهوى على اعناق كل المرضى
الذى لهتهم السلطه عن ما ال اليه حال البلد من انهيار
فى اركانه التى كان يستمد منها القوة والاصاله والمنعة
ونفتخر به فى كل المحافل الدوليه والاقليمية خار وداخل
هذا الممتد فينا مليون نسمة حبة تداعب مسامنا
ولكن
ولكن
ولكن
كيف صار السودان والسودانييين
بعد الانقاذ التى جاءت لتنقذ نفسها
لا للسودانييين والغبش
جاءوا من اجل المصالح الشخصية
والامراض التى يعانون منها منذ امد سحيق
طلال وانت تضع لنا فى هذا الاسفير عمل من اجل
الاعمال الرائعة التى تعكس الحال وتصور بالحروف
ما لا تراه اعين كثيرين
اذن انت من الروعة بمكان يسمح لنا ان نرفع كل
القبعات ونديك تمام التحية على هذا العمل الجميل
شكراً بقدر مسام الارض
بقدر ما نستنشق من هواء من هذا الوطن
وتسلم ايها المناضل بالحروف
الاستاذ \ هاشم صديق
شكراً
كبيـــــــــــرة
خواجه

ابوفدوى
مراقب القسم الإجتماعي

عدد الرسائل : 394
بلد الإقامة : الخرطوم بحرى
الإسم الكامل : هشام عبد الفتاح مرحوم عبدالقادر
نقاط : 3233
تاريخ التسجيل : 01/05/2009

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: العجَين المرِ هاشم صديق

مُساهمة من طرف khoaga99 في الإثنين أغسطس 06, 2012 10:51 pm

الرائع دوماً ابوفدوى لك كل التحايا والاحترام يازول ياكبير
أكيد هاشم صديق إنسان كما يجب ان تكون بكل معانيها
شكراً على مرورك الشفيف يا انسان ياممزوج بالالفه والإندهاش الحلو

khoaga99
مشرف القسم الإجتماعي

عدد الرسائل : 298
الإسم الكامل : طلال عبد الرحمن أحمد عبد الرحمن
نقاط : 3161
تاريخ التسجيل : 27/08/2009

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: العجَين المرِ هاشم صديق

مُساهمة من طرف ابوخاتم في الأربعاء أغسطس 08, 2012 4:42 am

الشفيف دوما طلال

سلامات ومُنتهى الأمنيات الطيبة
يا سلام عليك يا زول يا رائع وانت بتفتح في مسامات الروح المنكسرة وتشد في جلد النضال النشف .. يا سلام عليك وانت تهز فينا بفال فجر قادم عما قريب ... كم هي رائعة صرخات هذا الهاشم وكم هي صعبة التناول .. فهذا الشامخ لا زال دائس على الإبر المسممة بالهواجس والضياع ....

وشكرن كثيرن ياطلال

مؤونة حُب
دوما ـ ابوالخاتم

ابوخاتم
العضوية البرونزية

عدد الرسائل : 492
بلد الإقامة : الدوحة ـ قطر
الإسم الكامل : عثمان احمد صالح الحاج
نقاط : 3531
تاريخ التسجيل : 20/09/2008

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: العجَين المرِ هاشم صديق

مُساهمة من طرف khoaga99 في السبت سبتمبر 01, 2012 7:01 pm

الوديع المُلهم ابو الخاتم
تحايا وارفات الروعه اجمل لمن يشعرون بها
لك كل الود وتزاحم من الرهفه والاشتياق
شكرن كثيرن
على مرورك الاجمل

khoaga99
مشرف القسم الإجتماعي

عدد الرسائل : 298
الإسم الكامل : طلال عبد الرحمن أحمد عبد الرحمن
نقاط : 3161
تاريخ التسجيل : 27/08/2009

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: العجَين المرِ هاشم صديق

مُساهمة من طرف مهند عبد الله في الثلاثاء ديسمبر 04, 2012 6:25 am

الاخوان :طلال,وابوفدوى,وابو خاتم
السلام عليكم ورحمة الله
من الملاحظ تفاعلكم مع القصيدة الرائعة من حيث الصورالبلاغية والمفردة البسيطة و غير الصادقة فى مضمونها.هكذا هم الشعراء يبالغون فى تصوير المواقف.وهكذا هم من لهم ميول سياسى معارض يحاولون اظهار الجانب السالب دون النظر الى الايجابيات.عزرا اخوتى لانستطيع تقيم حكم الانقاذ من جانب واحد .ولايستطيع الا من كان محايد.
لم يدون التاريخ افضلية لمن سبق الانقاذ فى الحكم .ولكن اعترف بوجود الهنات ,فأذا عولجت ستكون تجربت الانقاذ مثالية

مهند عبد الله
عضو فعال

عدد الرسائل : 75
بلد الإقامة : السودان
الإسم الكامل : مهند عبد الله عبد الصمد
نقاط : 2204
تاريخ التسجيل : 05/04/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى