منتدى قرية الدناقلة
DANAGLA CYBER COMMUNITY

جمهورية السودان
ولاية الجزيرة

مجتمع قرية الدناقلة الرقمي

أخي الزائر الكريم

اذا لم تكن مسجَّلا بعد في منتدى قرية الدناقلة, نرجو اكرامنا بالتسجيل و الانضمام الى أكبر تجمع رقمي لابناء قرية الدناقلة على الانترنت

اذا كنت مسجلا فعلا, ارجو الدخول و عدم حرماننا من رؤية اسمك على قائمة الأعضاء اذا واجهتك مشكلة ارسل رساله الى الهاتف 09117685213

ولك وافر الشكر و الامتنان

أسرة منتدى قرية الدناقلة

روائع ابو السيد التي اطربت الدنيا

استعرض الموضوع السابق استعرض الموضوع التالي اذهب الى الأسفل

روائع ابو السيد التي اطربت الدنيا

مُساهمة من طرف الجعلتي في الثلاثاء أبريل 07, 2009 10:20 am

تغنى الاستاذ الرائع دوما ابو السيد لكم من الشعراء وكتوثيق للشعر الذي تغنى به ساختار لكم بداية بابو الشعراء الرائع حميد
الخلاص
ما طال فى بحرك فى مى
وتمرك مفرع بالجريد
شدرك أمد حدّ السمى
طينك معتـق بالطمى
نبنيك أكيد .. نبنيك هوى
نبنيك أيوه سوا .. سوا
من أوجديد نبنيك جديـد
****************
ياإيد أبوى على إيد أخـوى
على إيدى انـا
على إيد و إيـد
تجدع بعيد فى اللجة
فى من راس ميضنة
حيكومة الفقر الدمار
الكضبن و الصهينة
اللى نقاص أيامنا كاس
اليالطيف سوس البحر
نرجم قفاهو حجر حجر
من ها الرصيف
الما قدر قدام
سريحة الموج يقيف
الما انستر
الارزقية وناس مو يا
نسقيها كاس أسقتنا يا
نوريها كيف عشق الحياة
سنانا فوق حجر القصاص
سوانا ناس ارض البحر
جوانا احد من الرصاص
*************
يا ضو حبـيبـين القسا
طول ما انت غرقان فى الأسى
تبت يدين ما ترمى ساس
ما تبنى مجدك من جديد
تفتح شبابيك الخلاص
تدخل نسيمات النشيد
بيت القصيد يستقبله مستقبله ..
و الحاضر الماضى التليد
******************
يابلدى يافردة جناحى التانى
وكت الناس تطير لى عالمه
وآ وجعة الزول البيجيك
ما يلقى فيك غير الهجير
ناسا تواتى مسالمة
كل البشاشات القبيل
يلقاها ميته مسممة
والجاته جاته من الأرض
ما جاته من تالا السما
ما أعتى غبنك يا ولد
وأعدل قضيتك وأعظمة
لاترجع السيف الجفير
والدنيا فايره مصادمة
من غير تجيب تار البلد ..
ريح العوارض تهزمة
تطرد مع ابليس الأخير
دعة الضلال من جنتك يا آدمة
تاكل من الشجر الحلال
يغشاك نعاس فى ضل رمى
تختاك هضاريب الصعب
كربة ليالى المظلمة
***********
يانيل قبل خاطرك يطيب
أرضك تفزع باللهيب
تكشح تواريب الغضب ..
صعب المراس ..
نوبة و زنوج و بجة و حلب
رطانه عربان مو أشو
ومولدين تلقانا أو نلقاك ضوء
ظلمة لياليك العجاف
رشه نهاراتنا النشاف
آمنا بيك وموحدين
فى إيدنا فاس وقلم رصاص
شتلة و كمنجة و مسطرين
و طبنجة فى خط التماس
حراسة من كيد البكيد
ضد الرصاص والانتكاس
نبنيك هوى وأشد باس

بت العرب النوبية
الشوق من حالفْ لا قاصد
إتلمَّ يهز ليك .. يا نوراى
يادرقة وسيف
يا حضناً .. كيف
من شر الصيف والشتا .. ضاراى
يا شعلة عِـز .. بقـّت جوّاى
عدّت بى ضلام بحراً عاصف
...................
يا بت العرب النوبية
يا بت النوبة العربية
بى فردة نخوة .. بجاوية
أو شدر الصحوة .. الزنجية
دسينى من الزمن الفارغ
من ريح المتعة .. الوقتية
من شر الساحق والماحق
بين دبشْ المدن .. المدعيـّة
والليل إتحكـّر بيناتا
كحـّل بى دبشو عويناتا
يا شمس الناس .. المنسية

مساورة
يا جمة حشى المغبون ..
فى الزمن الهلاك من جا
تكون حانت مواعيدك ..
يكون وكت المطر قد جاء
وشرق ضوى البلد عيدك ..
وطابت نسمتو العرجاء
و نكون يا طيبة تمينـا ..
وبدين ولفنـا ..
غنينا الغنا الراجا
بدت كاس المودة تدور
عشق من حلفا لى راجا
حبابك ألف .. وكت جيت
وياعنزنا القرجة
ويا لبانة فى الزمن المراحو نشف
ويا جبانة للخوانة والعوج
البدور .. و ويلف
دميرتنا البتسقى جرف
مسيرتنا وعرش بيتـنا
وتميراتنا اللىقالوا وقف
أصابعين الرجال رصاص
شعر راس البنية سقف
تكون دارت الزمن عمرت
نكون لمينا فى الفاتو
تكون فاقت ملامحنا
وتضاريسنا القبيل غمرت
دقش ساقت بوابيرنا
وندت شتلات بعد ضمرت
ضراعيك يا الولد كبرت
مراعيك يا البلد كترت
خدار .. خدرت غزار غزرت
خضارا زين برغم الصيف وصنعاتو
برغم البين واناتو
عصافير الجلد قدرت
تباصر نسمة منتحرة
تطمن غيمة مندحرة
تضاير الغابة والصحرا
من الغمة وظلاما شين
ومنك يا دقين تنفك
وتكون حلت عقدة الدين
*************
عقب سيرة البلد سارت
على النغمة العديل الزين
بعد دة الحال بلاهم سال
يجو العمال يجو المداح
يجو الناس البخبرو شليل
وشقيش راح
وقمريتين جناح يندل
فوق الصاح
من الغفلة ورياح الليل
ودى الدنيا الجديدة جناح
صباح يندل شدة حيل
فيا خيالة عدو الخيل
وياالسمحة البتملا العين
مدى ونفاح
بحز القلب غنوة وآه
حنان بلدو حنين منفاه
يا بت العز يا ست الجاه
يا هسع فينا يا ما ضينا
يا بكرانا .. يا بعدين
نكون كنا وبقينا متين
متين تشرق مواعيدك
مواعيدنا ونساورك وين

شوك الشوق
شوك الشوق لى الشوف آ خَىْ
ضارب فِطن النسج الحى
يا منقاش أحزانى إنشرت
وادى الفرح إتمدد صَى
يا راحلين عِـنْ دُغُش الليل
ما لاقيتو جناياً زى ..
تكية نخل الفجُر الجاسِر
فوق فى المتَرَة .. عَرَاجِنْ ضَى
آ رعاوة .. العرب الرُّحّل
ما لاقاكُنْ فى المطرانى ؟
فى كاويقْ الجرف الأمحل
بين أسراب الرهو الراحِل
ساند أكتاف الليل الميّل
عِنْ ساساق الغيمة عليكُن
بين رقراق الخيمة معاكُن
ما أديتوهو شِوَىْ ... بى حرجل؟
*************
آ رطّانة الليلُن ليّل
ما لاقاكُن فى ونساتكُن؟
بين الشادِى وبين كاساتكُن
فى صلواتكن .. عِنْ دعواتكن
أو .. دقساتكُن عِز خلواتكُن
.. زول .. زول الله
إن مِحِن .. آ .. بِسأل

الهبّاد لى غُلبْ أخواتو
الفرّاح عوّان الحلّىِ
الفدّاع لى الليل ظُلماتو
آ نجمات .. شقيش قولن لى
ما لاقاك طالِع .. متدلّى ؟

المطيوب من طيبة أُمّاتو
كالفجّاج .. الندّ نباتو
موج البحر اللّحَمَر هوجتو
وعِرق العِرِق .. اللاّوى ثباتو
جانا الشَدر الأخَدَر منو
ونار الشدر الأخَدَر جاتو
فات شِقيش ...
أب قولاً واحِد ..
وليش ما يرجع من غُرباتو
طوّل طُول .. ما طلّ علينا
وقاطِع مِننا جواباتو
الغابات جات تنشِد منو
والعربان راجين جياتو
أديناهم عرقو .. وعَلَقو
صورتو يقلِّب فى كِتْباتو
ضُل رشاشو .. ركيزة زولو
ساعة سِلمو .. ويوم حوباتو
سِن طوريتو ولون أبرولو
حِس طنبورو البى نغماتو
لهْلَب عِشق الناس الفقرا
وبرّد جوفُن .. بى غنواتو
... ويا غنواتو
الدخلت فينا
تمرق .. جينا على جِلاّتو
وجِيداً جينا .. طلقنا وشينا
وش الدنيا الليلة حلاتو
وش أطفالنا الليلة حلاتو
وغنى معانا غنانا هويتو
غنِّى العالم
غنى حياتو
لا ساومنا عليها قضيتو
ولا فكينا من إيدنا .. وَصَاتُو
ألف شليل يا نورة يفوتو
عشان ما يجيك شليلك زاتو



الجعلتي
مشرف القسم التوثيقي

عدد الرسائل : 1754
بلد الإقامة : دردق
الإسم الكامل : يسري بشير الامين محمود احمد البشير
نقاط : 5187
تاريخ التسجيل : 09/03/2009

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: روائع ابو السيد التي اطربت الدنيا

مُساهمة من طرف الجعلتي في السبت أبريل 11, 2009 7:25 am

محمد طه القدال


الحليوة ليلة المولد(بقول غنوات)


بقول غنوات بقول غنوات
فى البلد البسير جنياتها لى قدام
وفى الولد البتل ضرعاتو
فى العرضة

ويطير فى الدارة صقرية
ولو السمحة تلت إيد ومدت جيد
يقوم شايلاهو هاشمية
ويشيل شبال وختفة ريد وفرحةعيد
وريدة روح وحمرة عين وايدية
ويالولد البشيل مدقاق
وقولة خير على القمرة
يقابل الجاية متحزم
ويدارك الجاية متلزم
كلام فاسك على أرضك
يبقى عديلة يا بيضا
ويبقى زفاف تزغرد ليهو قمرية
وقبال حول تغّيم غيمة قِبلية
ترش الدارة والحدبة الصعيد الحلة
ويا فرحة بتطارد الصفقة فى
النسمة الصعيدية
ويا جهرة نهار الليلة بدرية
رحيح جنياتنا فى الحدبة
الصعيد الحلة
يا سمحاتنا هو لبلب
ويا قمحاتنا هو لبلب
وياللوز الفتق فى الوادى هو لبلب
ويا سمحاتنا هو لبلب
ويالبحر الطمح مدّادى هو لبلب

سألتك بالذى ركز الارض معبد
وسوى الفاس عليها مقـــام
سألتك بى حجا الأُمات ودمعاتنا
سألتك بى كبيداتن ودعواتنا
شليل وين راح
يكون ضل الخريف فاتنا
شليل وين راح
************
وزى برقة السماك الجابها دغشية
وزى زغرودة البطن الكبارية
مرق من شامة القــمـرة
مهيقد بى وداعة الله
ومقدم بالعديل يبـرا
تعالوا أبشروا يا جنيات
شليل ماراح ..
شليل ما فات ..
شليل عند المسورو حرق
بقالو حصاد
شليل فوق التقانت قام خدار وبلاد
شليل مسدار شليل مشوار
شليلنا أرضنا يا جنيات
شليل قايم نصاصى الليل
يتمتم ليلو وردية
حرازنا شليل شليلنا دليب
شليلنا دليل على البلدات
بعد درب التبلدية
شليل ما راح
شليل ما فات
شليلنا ونحنا همباتة ومهاجرية
مزارع بات على عشقين
تراب بلدو وسماح فوق بت مزارعية

الجعلتي
مشرف القسم التوثيقي

عدد الرسائل : 1754
بلد الإقامة : دردق
الإسم الكامل : يسري بشير الامين محمود احمد البشير
نقاط : 5187
تاريخ التسجيل : 09/03/2009

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: روائع ابو السيد التي اطربت الدنيا

مُساهمة من طرف الجعلتي في الخميس يناير 28, 2010 12:15 am

رعــــشة الشـــوق 
محجوب الحاج
مرة بقصد احكى عنك
وقولى من طابعو البشارة
شوفو ديك القمرة بانت
والنجوم حاطت مدارة
غيبو اتلاشو فى عيونة
وغوصو فى اعماق مدارة
وابقو اعرفو من صفاها
كيف صبحت اسيرة هواها
وراسى فى ابعاد قرارة
***********
الا لو مرات سرحت
وقمت لمحت وقرونى
وعرفو كل البينا عامر
اصلو باين فى عيونى
اعرف انو بحسن نية
باحت الاعين شوية
افشو سرى وغافلونى
واتعرف ريدك متاعى
وانو فكرى واقتناعى
والسعداة الضالة كونى
وبسالك يا زارتى عنك
والبراءة الفى عيونك
الرزانة الفى انفعالك
والضجيج الفى سكونك
انت ابعد من خيالى
ورعشة الشوق فى سؤالى
بتحكى عن ابداع محاسنك
وعفة الطبع البصونك

الجعلتي
مشرف القسم التوثيقي

عدد الرسائل : 1754
بلد الإقامة : دردق
الإسم الكامل : يسري بشير الامين محمود احمد البشير
نقاط : 5187
تاريخ التسجيل : 09/03/2009

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: روائع ابو السيد التي اطربت الدنيا

مُساهمة من طرف فدوى في الخميس يناير 28, 2010 8:19 am

لكن ماراااااااااااااااااااااااااااااااااااااااااااااااااااااااااااااائع يايسري
تسلم على الحاجات الحلوة دي وما عدمناك

فدوى
عضو مميز

عدد الرسائل : 130
بلد الإقامة : khartoum
الإسم الكامل : فدوى عبدالفتاح مرحوم عبدالقادر
نقاط : 3075
تاريخ التسجيل : 29/01/2009

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى