ماذا حدث يوم الجمعه الفاتت:

:: في يوم الجمعة وأول الشهر::
مازال في القلب بعضا من بهجة أول الشهر ...
حيث أنني لم أبقى صارف ومنصرف
نقدت سيد اللبن حقه كاملا ً...
ورفعت عقيرتي بالغناء ....
(اليوم نرفع راية استقلالنا ترارررررامم)
غشيت سيد الدكان أمشى الهوينى طرباً...
وأنا الذي كنت أزوغ بالشارع البعيد وأطوى الفلا طيا ...
لحدى ما أتوارى عن ناظرة ....
سيد الدكان يصر إصراراً ويلح إلحاحا ً...
بأن الزول البدين (الذي يعطى الناس من الدكان بالدين ) أرجل (أكثر رجالة ) من الزول البحل (البحل الدين )
وطبعا وافقته على كلامه رغم أن المقولة معكوسة...
بس طبعا كان لازم الدبلوماسية في مثل هذه المواقف لأنو الشهر لسه في أولوا والماهية حدها يوم عشرة ....
المهم في اليوم داك الصباااح وشاي اللبن بالكبايه الكبيرة قدامى ومعاها رغيفه كاملة لزوم التصبيرة لحدي ما تتطلع العصيدة وملاح التقلية عشان الفول في المكتب هرى الكبد والمعدة
ويوم أول جمعه من الماهيه ....
حاجة عجيبة زي حمد والديبة ...
فإذا بالباب يقرع ...
الله يستر واضح انو الطرق كان بسنة قلم ( بيك) وقلم البيك عن ناس المحلية ببلاش ..
السلام عليكم دا منزل رقم 56 مربع 3 بأسم
ايوة ياهو زاتو خير ....
نحنا ناس الموية عايزين القروش عليكم حق شهرين يعنى عايزين منكم 40 جنية.............
40 جنية دى قالا بالقديم عشان عارف المواطن كان قلت ليهم أربعين ألف ممكن يروح فيها (كتر خيروا عندو زوق والله فتحت عيني قدرالريال ابو عشرة)
كم شهرين وأربعين ألف ليلة ....
والله نحنا لينا أكثر من شهرين ماسورتنا ما شخرت حتى
لكنه أجاب ..........
والله أنا دى ما شغلتى انا على احصل الرسوم وبس ....
يا عالم ادفع كيف.. تصدق وتآمن بالله يا اخونا انا لى شهرين بجيب الموية بالجركانات من الجامع الجنب السوق........

والله انا ما عندى شغة بس الرسوم
أبيت ما بديك ولا تعريفة...
ح اقطع الموية منكم وح يكون عليكم غرامة توصيل بعدين .......

اقطعها ....يعنى شنو ما تقطعها ..عليك الله اقطعها قال اربعين جنية قال...

طبعا شاى اللبن بقى موية والرغيفة السمحة ديك حجرت فطلبت من المدام تسخن الشاى وقبال ما أشيل رشفة
كووكوو الباب دقا ... تااانى وبى سنة القلم
أيوه اهلا وسهلا ياناس المحلية ما بدفع اقطعوها...
نحن ما ناس الموية نحنا ناس النفايات ...
عليكم شهرين عشان الشهر الفات ما دفعتوا كنتوا فى مدنى..
طيب مادام عارفنا نحنا كنا مافيشين بطالب بي حق الشهر ليه
عشان دى الأوامر ...
دقيقة أجيب ليك القروش وأجى ....

قفلت الباب وأنا أصرخ بتاع النفايات بتاع الموية بتاع العتب بتاع الهواء
صاح بتاع النفايا ت من الخارج مضيفا الى قائمتى ..ما تنسى جابوا واحد بتاع رسوم عشان يحصل منكم رسوم الرسوم البتدفعوها دى . فخرجت إليه وفى يدى عكاز ولكنة كان قد تبخر.. لكن ما تعملوا زي .. بالسياسة
والحكمة كل الأمور بتمشي تمام ... والواحد تاني ما اشرب ليه شاي لبن يوم الجمعه.

محمد الامين يا رائع
تقبل مرورى

دا كلو يوم الجمعة بس انا عندى ليك فكرة
يوم تصرف المنصرف علق يافطة على الباب
اكتب عليها (البيت فارغ )
ههههههههههههه
والنشوف اخرتها معاهم ى
ولك كامل الود
ابوفدوى

الحنين ود العمدة
لكن دي ما كانت كباية شاي ورغيفة
يعني لو عملت نسكافي مع تورته كان جوك ناس دمعة اقصد دمغة الجريح

..... ابداع والله ابداع ...
نحن في انتظار يوم السبت

تحياتي

مشكورين الأخوة الأجلاء على التواصل :
- الجعلتي :
إنتا شفت حاجة - لسه بعد ما تصرف ليك راتب.
- وليد الطيب :
الروعة تزدان بوجودكم.
- بنجور :
لا أقول شي غير سوي - الله يخليك.
- الرائع أبو فدوي:
اللافته أظنها جايه - وشكراً للمثالية العالية
وهي طبعاً أحسن من العكاز.
- العزيز أبو الزعيم :
كلامك صحيح حالتو دا -- شاي لبن مع رغيفة.

وأقول لكم " كل الآمال الله أخليكم ** وقهرتكم من عين الناس الله"
ولكم عميق أمتناني ،،،،

العزيز ود العمدة
لك الف شكر
ومازلنا نلح على مواصلتك لهذا البوست ومتابعت ايام الاسبوع
يلا شد حيلك معانا وورينا السبت والاحد وغيره

و كن بخير

مرحب بيك يا غالي :
-- ود الياس ( أبو الزعيم )
-- نحن في الخدمة ... وأرجو أن أوفق في ذلك :
يوم السبت : ( مع ناس النفايات ):
انا مرة دقستا وفتحتا الباب لقيت البت قااشرة قالت دايرة حق النفايات علينا شهرين برضو متاخرات...
وبما انو كنت دوبي جاي من السفر أديتا طوالي وما ناقشتها...
عندنا في البيت بابين مسافة ما أصل جوه دق الباب الوراء مشى ولد خالتي وجاني قالي جيب 80 ألف تانى بت النفايات جات...
ومشيت عليها سلالالامات يا اختي شنو القصة هسه واحده جات قالت لي دايرين منكم حق كم شهر ؟؟؟
و هسي دفعتا لي زميلتك قبل دقيقة بالباب القدام ...
أها قالت لي الخبر الذي وجع قليبي ...
شنو !!! قالت لي ما في حاجة بتكلم مرات مرات براي ساي...
شوف يا أخو أنا بس شغاله في مربعكم دا وما في غيري؟؟؟
وبعرف أخوانك وأخواتك وناس بيتكم كلهم.........
وقعدتا أحكي وأوصف ليها البت ..هي تحلف وأنا احلف ..
وابن خالتي داك احلف...
وأخيراً --- عرفتا – الحمد لله...
لكن زاغت مرة تاني مني ...
قالت لي شلتي منها فاتورة طيب...
تراااراراااااا قلت ليها لا والله
طبعا لمن قالت لي كدا ...
عرفنا حاجة واكتشفتا الدقسة ...
وقلت ليها والله شارعكم نظيف و شلتا رجولي ودخلتا البيت...
خليت ولد خالتي يتكلم معاها...
وبدت المعرفه ... لكن المره الجاية لازم تشيلوا فاتورة...
إنشاء الله --- إنشاء الله --
مع السلامة...

الحريف ود العمدة
تسلم يا غالي لاستجابتك السريعة
وقلت لي دقسوك
معليش تعيش وتاخد غيرها
لكن انت برضو غلطان في حد يدفع قروش كده ساي للحكومة ده اذا هي صحي بتمش للحكومة من غير فاتوره
اعمل حسابك يا اخوي بتاع اللبن تاني طالبو بي فاتورة

مجمل تحياتي لك
وفي انتظار بقية الاسبوع