الشيخ حاج الماحي

أفرد هذا البوست لأشعار ومدائح الشيخ الماحي

ولد الشيخ الحاج الماحي بن محمد بن الشيخ بن أحمد بن عبدا لله عام 1789م في قرية الكاسنجر قرب مدينة كريمة وتوفي بها 1871م
وقد رزق من الأبناء أحمد والمجذوب ومحمد وعبدا لله وحمزة ومن الإناث زينب وسكينة


1-شوقك شوى الضمير

شوقك شوى الضمير أطراك مناي أطير
أنا حابك من صغيـــر بريدك يالبشيــــر

بسم الله يــا قديـــر يا عــالي يا كبيـــر
يا جابر الكسير دبرنا يا بصيــــر
بي أحسن التدبير من فضلك الكثير
جود يا كريم بي الخير أنصرنا يا نصير
ويسر لنا العسير
ثنيت بالبشير محمد النذير
شفيع القمطرير يوم موقف الهجير
والشمس تستدير يجري العرق خرير
تتفلت أم زفير جانا النبي الأمير
بي كفو حين يشير يخمد حمو العسير

يا فمي جيب تشكير لي الكمل أهل الخير
ناس سيدي بابكر كان للرسول وزير
الفاروق مع الحبر لا زالوا بي تكبير
الرابع القاهر كرار علي الظاهر
زام صدرو بالكرير بي سيفو ذو الفقير
كم رامي لي زنطير قال فاسق الحمير
أخير لنا الفرير قاليهو يا خنزير
ما بينفع التعذير جنزر كلاب النير
ملاهم جنازير

وين ستت التدبير السامو للعمير
ناس طلحة والزبير سعد و سعيد صفير
ياعبيدة العمير عمار بن ياسر
الكندي متبدر ضرغام ضرار شاطر
سيدي ابن عوف عاشر كاد بولس العوير
ابن الوليد نادر في حمزة يستتر
هو الحلل الكشير الصقر اب قراقير
فوق العلوج نفير

ياخواني لا البااقير لا قوز البسابير
مويس والسناهير السيال مع الجوير
كرقوس والمغاوير الدامر والعشير
الباوقة و البنقير مقرات مع اب سدير
بي داير المناصير جيراني الكجاجير
قريب الكواوير جريف الحواج نير
سقاي ولاد بشير عمران و السواعير
دويم ود حاج شهير تنقاسي و القرير
الدتي و الحجير حلة ولاد بصير
جزيرة ود سرير عربان الهواوير
في أبقش التجاجير لاتنس الجبابير
سوابق والبدير لا أرقو و الحفير
ابريم كنوز والدر مايشوفو زمهرير
في زفة الوزير

صليت ألوف تكرير سلاما غير تعبير
بي عد التفاسير عدد الدواب و الطير
الصقور و الزرازير الجراد و العصافير
ونبات و العتامير القوي والقرير
الحنطة و الشعير من عبدك المحيسير
الماحي المغيرير خايف من الكرير
يوم يقطع الفرفير داير الرسول يحضر
عن ضمة القبير يحبس سؤال نكير
في بيتو مستتر لا يومت النشير
في تاجك ننحشر

2-صلاة وسلام لي محمدا
صلا وسلام لى محمدا *** خاتم الرسل سيدي أحمدا
يا لساني قول الله واحدا *** حاشا لم يلد لالُو والدا
واجب الوجود باقي مفردا *** أنفى للشريك عَنْهو وأبعدا
مالك الملوك سامع الندى *** رازق العباد فَضلو واجدا
باسط النِعَم ليهو نحمدا *** نسألو القبول والمشاهده
يشرح القلوب يجعل الهدى *** في رضاك يا ربي نعبدا
نمدح الرسول ديمه سرمدا
أثني بالرسول المؤيدا *** التقي الرؤوف الممجدا
كامل الخصال والمحامدا *** صاحب الِلو وصاحب الرِدا
ليلة الولود خَرّ ساجدا *** طاهراً نظيفاً مُبرّدا
مكسي بالجمال وجهو يوقدا *** أفلجاً كحيل غير أثمدا
حاجبو كالهلال قارف النِدا *** نورو بَقّ في الكون ضوّا من بدا
فاق على السما حتى أصعدا
طاهر الأكفاف يا محمدا *** كامل الأوصاف يا محمدا
أنت أبي الشراف يا محمدا *** سيد الأمة كاف يا محمدا
قلبك الرءآف يا محمدا *** تَرجِب البخاف يا محمدا
نورك الرفراف يا محمدا
ليلية الوٌقاف يا محمدا *** للكرب كشَّاف يا محمدا
السلام أرداف لى محمدا *** مِنّي ليك آلاف يا محمدا
حابّك الجليل يا محمدا *** نخبة اسماعيل يا محمدا
أنت خير الجيل يا محمدا *** صاحب الخليل يا محمدا
سيد لِوى الإكليل يا محمدا *** وجهك الجميل يا محمدا
طرفك الكحيل يا محمدا *** شَرعك العديل يا محمدا
حاشا ما ب يميل يا محمدا *** جيتنا بالدليل يا محمدا
ليلة الزِلْزِيِل يا محمدا *** يا التخمْد الويل يا محمدا
الجذع بكا لى محمدا *** جَاز وانتكا لى محمدا
الجماد حكى لى محمدا *** والبعير شكا لى محمدا
جَلْ ربَّكا يا محمدا *** عَلّا قدرك يا محمدا
أين مثلك يا محمدا *** الرُسلي سابكا يا محمدا
مافي بعدكا يا محمدا *** وافي وعدكا يا محمدا
ضاوي وجهكا يا محمدا *** فاق جمالكا يا محمدا
المباركا يا محمدا *** لينا ادركا يا محمدا
الجِذع رزم لى محمدا *** جَار بالبرم لى محمدا
الجماد نظم لى محمدا *** لا لسان لا فم لى محمدا
المُنير قَسَم لى محمدا *** خَرْ وانقسم لى محمدا
القَصِير أب دم لى محمدا *** قاّلو فيَّ دم لى محمدا
ذلك الأصْم لى محمدا *** إن وِطاهُو جَمْ قول محمدا
كم وكم وكم لى محمدا *** لا عدد لا كم لى محمدا
طاهر القدم يا محمدا *** اللَّى الرسل ختم يا محمدا

3- سمح الوصوفو
من القصائد الطويلة جد ( 82 بيت )
آداء/ أولاد حاج الماحي
أداها أيضا / خالد الصحافة

سَمح الوصوفو يا رب نشوفو حَرَمو وسُرُوفو ..نَعقِبْ نطوفو
الراوي سَمّ ونقّر دفوفو *** مَدحاً مُوزّن ..فوق الحُروفو
بالألف.. الله ربي اللطوفو *** بالباء .. بهلّو الأسرار في جوفو
بالتاء .... توانى مِسْكو العَسوفو *** بالثاء .. ثنايا بَرقاً خَطوفو
يالجيم .. مجمّل سمحات وصوفو *** بالحاء .. حُيُالو ضرع العجوفو
بالخاء ...........لخلقو ينظر يشوفو *** بالدال .. دَواياَ للصايبو جوفو
بالذال ..لى ذكراً شاع في الخيوفو *** بالراء .. رءوفاً للناس عَطوفو
بالزين ....... لى زياً يوي العَكوفو *** بالسين .. يساعد للكان لهوفو
بالشين.. شفاعتو يوم الوقوفو *** بالصاد .. صحابتو شايلين سيوفو
بالضاد .. يضوّي بين الألوفو *** بالطاء .. مُطهّر قلبو الرؤفو
بالظاء.. يظِلّو الغيم رفوفو *** بالعين ..علامتو فوق الكتوفو
بالغين .. غَفَرْلو وأمّن لى خوفو *** بالفاء .. فصيحاَ للسر كَشوفو
بالقاف ....... قفّل باب الخسوفو *** بالكاف .. لى كفاَ ينبع سُرُوفو
باللام ..... لِماهو يا رب نشوفو *** بالميم .. معاهو يوم الوقوفو
بالنون .. نروّح لى ذاك غوفو *** بالهاء .. نهاجر ونسعى ونطوفو
بالواو ...ولامِن آخر الحروفو *** بالياء.. يمينو يكرم ضيوفو


يا ربّي سَآلك تقبل لى مطلب *** تعطيني جملاً كَبِبي أصهب
مُو الدون قِصيّر وماهو المشقلب *** أصهب بشاري طايع مأدب
صدراً مفجَّج في شوفتو ترغب *** سَرجاَ سناري محكوم مذهب
والفروة مِرعِزْ اتنيها واركب *** فوقو إن رفعت من حينو جَلّب
قُلتْ يا سلاماً أقبل وقبقب *** تسمع مشيهو رجليهو طَبْ طَبْ
ينسف دوايرو بينات يلعب *** ليهو المسافة تِنْصّرْوتقرب
الماحي فوقو بىمدحو يطرب *** بى زمزميتو والزاد محقّب
إن ردت تاكل وإن ردت تشرب *** هوِّى ومُناي في ام سور وكوكب
القبة خضراء ونساما هبهب *** نوصل نزورو وفي شفاعتو نُكتب

4-يا رحمن ارحم بى جودك
يارحمـان ارحم بى جودك دلى الغوث ينزل فى بلودك
سم يا فمى اذكر معبودك قول يا واحدا حى فى وجودك
يا مسعد اسعد بسعودك ونحن نصلى على مريودك
*****
يا رحمان ارحم بى برك يا حافظ فى بحرك وبرك
فى وليانك اطلق سرك خل نيشاتن اليتحرك
*****
آمين آمين يا كاشف الغمه جنب ها الدابى تصبحو رمه
تسلط واحد ايدو مدمه يعجل قتلو قبيح القمه
*****
يا الخلفا الحالكم مرضيه يا اهل البيعه العقدوا النيه
التمساح سكن الشايقيه خلو اليروح نسيا منسيا
*****
يا ابن ادريس عدل نيشانك فوق الكل عامر ديوانك
هم يا شيخ الناس حيرانك فى التمساح بين برهانك
*****
يا ابن ادريس شيخنا النورانى يا صاحب الفتح الربانى
يا ابنو العركى ويا السمانى ارمو سهامكم يا فرسانى
*****
شئ لله يا ذات التجلى صاحب السر والفتح الكلى
يا الغوث البى الكون متولى التصريف هيلك عجلى
*****
يا عبد الوهاب التازى يا اب درعا منسوب بى حجازى
التمساح تمساحا خازى درنا العوم ادونا الاجازى
*****
يا الداسوقى وشيخو رفاعى يا حسن التواع كون واعى
الشبلى وشيبان الراعى ارمو سهامكم يا شجاعى
*****
شئ لله يا اهل الدايره يا الفى الكون اسراركم سايره
ارخو السر فى السحره الغايره خلو الدايره التصبح نايره
*****
وينكم لى وينكم يا قومنا سهرانين نحسب فى نجومنا
التمساح حجر لى عومنا ان ما جيتونا عليكم لومنا
*****
وينكم وينكم يا ديله يا اهل ا لحضره الليله الليله
اجتمعوا وخلوا البهديله التمساح احموهو الشيله
*****
وينكم لى وينكم يا كمل يا لحاق فيكم بتأمل
يا الفوت البى الكون اتحمل عرض الدار روح يتهمل
*****
وينكم لى وينكم يا كسر يا لحاق فيكن بدثر
التمساح بلحيل انجسر امرو عليكن ماب يتعسر
*****
شئ لله يا حسن البصرى صهيب الروم ذا النون المصرى
يا الدباغ ابو سرا يسرى يا ابن المحجوب الناس متحسرى
*****
شئ لله يا اب جلابيه يا عثمان شيخ الختميه
يا الصلاح جمله الاولياء التمساح شوفولو اذيه
*****
شئ لله يا راجل البقعه يا اهل الحضره البعد الهجعه
يا الفكى شيخ الهام اب تسعه شيل الدابى تحتكم بدعه
*****
شئ لله يا عبد القادر محى الدين البحر السادر
يا ود زينب قوم لى مبادر يا ود حاج قول جيتكم حاضر
*****
شئ لله يا راجل البركل يا قايم الليل ماب تكسل
يا عايم بالله اتوكل قول للدود من بلدى اتفضل
*****
يا اهل الركب الفات بى ليلو ما فيكم واحدا شاد حيلو
احمد واحمد واحمد شيلو ود عدلان فوق راسو اديلو
*****
يا ياسين يا ود حميده يا اهل القبه الباقيه فريده
انتو ما ابتا طيتو اكيده ما بتغلبكم هذى الصيده
*****
يا رجاله نورى اتلموا خلو الغفله جميعكم هموا
محمد صالح قام بى عمو لطم الدود بالسر فوق فمو
*****
يابا حمدتو اب نايبا شوكه صاحب سر وايدك مبروكه
يا اب نيران الحقنا بابوكا هم يا شيخ الناس زموكا
*****
يا الفكى شيخ العبد الصالح يا لحاق فى بحر المالح
ود بيلى و عووضه القارح وين حاج عيسى القدر الطامح
*****
يا اب شارب واولاد السته امانى عليكم ليش ها السكته
اسمع يا شيخ القول ليك انت جرت الحين فى بلادكم نكته
*****
الزرق ابوات ود حاج موسى يا الكمل ما فيكن دوسه
البلد الكانت محروسه اتحجر العوم والناس محبوسه
*****
يا ود جابر ليك بنادى قوم با خوانك لا البولادى
يا العجمى اب رزقا صيادى اخدوا الشكره العادى العادى
*****
يا اولاد جابر بى عجميكن قوم الخمسه واكربوا سريكم
نادوا اب رابعه وخلوا يجيكم قتل الدود مو قاسى عليكم
*****
يا وراق يجن حوباتك فى التمساح بين آياتك
خلو يصوب من بلداتك لا يتمسخر فى زوراتك
*****
شئ لله يا رجالتنا شرف الدين فرسان المتنه
صالح السلمى اسمعوا كلمتنا احبسوا الدود لا يطل صفحتنا
يا النبى بى جاهك ثبتنا احفظنا واستر عربتنا
اكوى اعدانا وكيد شامتنا فى الدارين اكتب راحتنا
*****
البنيان يا جمله صحابى الغوث يا قطب الاقطابى
الشبلى وبدوى النشابى ارخو السر فى هذا الدابى
*****
على المحبوب صل يوت يا برا عدد مخلوق جميع لا الذره
نظملوا الماحى قصيده وجرا تنجى الامه فى يوم الحرا
*****
صلاه الله عدد ما لبا وقاف الحج وطواف الكعبه
سلاما جابوا الماحى معبا يعم السيد والال والصحبا

5-طيبة

طيبة الجميل وساما يا ليله جات نساما صلاه عليه وسلاما
يــا ليـلـة ولــدك وافــي فــى الـحــج وقـفــوف وطـوافــا
يسـعـى ومـنـى وإزلافــا زمـــزم يـشــرب لـــى سـلافــا
يــــا لـيـلــة لـيـلــك جــافــا ولــــدك حـكـايـتـو خــرافـــا
نـاقــص خـشــوع ومـخـافــه واقــــع لــقــي الاشــرافــا
يــــا لـيـلــة دى الاوصــافــا يــاتـــى الـقـلـيــل وكـفــافــا
صــاحــب اســيــد وحــذافــه انــــور جـمـيــل وقـيــافــه
دا الـحـجــا بـالانـصـافــا فـــــى الـمــلــه ولا الأحـنــافــا
دا الاكـــــرام الاضـيــفــا ود هـــاشـــم عـــبـــد مــنــافــا
الــوجـــه نـــــور كـشــافــا يـالـيـلــه ديـــنـــو نــضــافــا
الــفــات الـجـنــة وشــافــا قـطـعـولــوا مـــــن اقـطــافــا
يــــوم الـخـلــوق اوقــافـــا يــســـر ويـمــيــن وعــرافـــا
نــــادوا الـبـزيــل الافــــا نـصـبـولـوا لــــواء الـخــلافــا
صـلـيــت عــــدد آلافـــــا عـــــدد الـخــلــوق وصـنــافــا
يــــا لـيـلــة نــطــوى مـسـافــة بـالـنــون قــبــال الـكـافــا

6-يا ربي فرج همنا

يـاربـي فــرج همـنـا فــي جــاه نبيـنـا تلمـنـا
بـسـم الله ننـظـم نـمـنـا بالله الـمـفـرج هـمـنـا
عالـم عددنـا وكمنـا كـل سـاع رحمتـو تعمنـا
أثـنـي الـكـلام لــي الأمـنـا أدم أبيـنـا وأمـنــا
أحمـد كسبنـا وخمنـا فـي جاهـو ربـي يلمـنـا
ليـلـة وقـافـنـا وطـمـنـا نـنـفـر ابـيـنـا وأمـنــا
حـر الهجيـرة يحمنـا جـاه أب علامـة يعمنـا
ايـاك ضرانـا وضمـنـا ايــاك كـشـاف غمـنـا
لــولاك يــوم ملمـنـا الجـنـة خـيــرا يسـمـنـا
ايـاك مياهنـا وجمـنـا وايــاك عطـانـا وكمـنـا
سيـد لحمنـا ودمنـا وشوفنـا وسمعنـا وشمـنـا
لـيـك بـنـردف نمـنـا تـفـرج صـلاتـك هـمـنـا
يانـور قلوبنـا ويمـنـا مـدحـك جبـرنـا وتمـنـا
أصحابو روحا مثمنا هم باعوا وهو المضمنا
كـرار يقـول متيمنـا نسقـي البطاريـق سمـنـا
الماحـي قـال لـك لمـنـا نـحـن وأبيـنـا وأمـنّـا
خالنا وجدودنا وعمّنـا فـي الراحتيـن تضمّنـا
الصّلا والسّلام من فمّنا بي عدد عددنا وكمّنا
ما صبّ وابل وجمّنا لي طيب زمانـا وشمّنـا

7-عيب شبابي الما سرح
عيب شبابي الما سرح *** والله لأب شوقاً جرح
قام العِبيدْ من نومو صَحْ *** لقا جنبو لبناً في قدح
سَمّى وشِرب زيّن اتنتح *** حمد الإله حالو إنصلح
جَدْ في السؤال لى ربّو لَحْ *** قال يا كريم بابو انفتح
أعطوه تفاحات بلح *** حين ذاقا قال دمّاعو تح
رادلو الجليل قلبو انشرح *** طاب قلبو مسرور بالفرح
جاب لى شفيع الناس مدح *** شتمو الهبيش دق ونبح
السمعُو في جوفو انجرح *** من شوق حبيبو يسوي أح
قام همّل العقبات رَوَحْ *** في شرقوا بالوديان سرح
شاف كوكبو الضاوي إتضحْ *** في الروضة فوق غوفو انبطح
شاهد رجالاً غير جٌنحْ *** ماسكا الدلائل والسِبحْ
ثنيتو بالنبي النَصًحْ *** الدينو للبلدان صَلَحْ
صادق اللسان الما فَشَحْ *** بالحق يقول حتى إن مزح
والله مثلك ما نجح *** بالرسلي ميزانك رَجَحْ
يومت وجوهنا بِقتْ قَبَحْ *** جاهك يعم الاتفضح
نوراً قديم في الكون سَطَحْ *** صلى الأله ليهو ومَدَحْ
في مكة جاب لينا المِنحْ *** في طيبة قبرو الانطَرحْ
الدنيا خيرا يزول لِمحْ *** تعكس عليك بعد الفرح
يا ناسي فرضك وانسدح *** الموت وراك إن طِرْ سبحْ
كم من عزيز فات وإنشتح *** بارودو يبكي تَرحْ تَرحْ
حين يومو تَمْ قَنَت وقح ْ *** في غفلة جا اللفّاح لَفحْ
كم من شباب قالب الكشح *** فوق البريم لابسا التَلحْ
راح في التراب فوقو إنكتحْ *** زيو المليحْ غَبّا وانقبحْ
يا الماحي كسلك ما بيصح *** شوف الدقوني الفوق نَجَحْ
رحم الله للعاقب بَرحْ *** في وصفي انا الدون والأشح
يا ربي صلّي كما شرحْ *** تسليمي عد برقاً لَمحْ
عدد العنب عدد البلح *** للمِنْ بهامو النيل طمح

اللهم صلي على سيدنا محمد و اله وسلم بعدد ما خلقت.